Follow us: Youtube Android App
Somersby Nepal
सिलवाललाई खोजिरहेका छौं, जहाँ भेट्छौं पक्रिन्छौं : एसएसपी ऐर
२८ पुष २०७४


काठमाडौं   प्रहरी परिसर ललितपुरका प्रमुख एसएसपी गणेश ऐरले पूर्व डिआइजी नवराज सिलवालको खोजी जारी रहेको बताएका छन्। 
विवादित बढुवा प्रकरण हुँदा अदालतमा बुझाएको कार्य सम्पादन मूल्याङ्कन फाइल कीर्ते गरेको अभियोगको अनुसन्धानका लागि प्रहरीले पूर्वडिआइजी सिलवालको खोजी गरिरहेको छ। 

ललितपुर क्षेत्र नम्बर १ बाट प्रतिनिधिसभा सदस्यमा समेत निर्वाचित सिलवाललाई अनुसन्धानको लागि उपलव्ध गराइदिन महानगरीय प्रहरी परिसर काठमाडौंले ललितपुर परिसरलाई पत्राचार गरेको थियो। एक सातापछि ललितपुर प्रहरीले सिलवाल नभेटिएको भन्दै बुधवार काठमाडौं प्रहरीलाई जवाफ पठायो।

सिलवाल भने पूर्वनिर्धारित कार्यक्रमका लागि मलेसिया पुगेको दावी गर्दै आएका छन्। तर, उनले जुन एयरलाइन्सबाट गएको बताए त्यसको उडान नभएको र जुन ठाउँमा कार्यक्रम भनेको कार्यक्रम नै नरहेको तथ्य पनि फेला परिसकेको छ। यस्तो अवस्थामा के अब ललितपुर प्रहरीले सिलवालाई खोज्दैन त? 

ललितपुर प्रहरीले सिलवाल नभेटाएको भन्दै जवाफ मात्र पठाएको जानकारी दिएको छ। परिसरका प्रमुख एसएसपी गणेश ऐर भन्छन्, 'हामीले सिलवालको स्थायी ठेगनामा नभेटिको मात्र भनेका हौं तर हामीले खोजी जारी राखेका छौं। जहाँ भेट्छौं पक्राउ गरेर काठमाडौं प्रहरीलाई बुझाउछौं।'

Source